پنجاب حکومت نے صحت کی سہولیات کا دائرہ کار صوبائی حدود سے باہر بڑھاتے ہوئے 6 کلینک آن ویلز گلگت بلتستان کیلئے بطور تحفہ روانہ کر دیے ہیں۔
صوبائی وزیر صحت خواجہ عمران نذیر نے ضروری ادویات سے لیس 6 کلینک آن ویلز گلگت بلتستان کیلئے روانہ کیے۔
اس موقع پر خواجہ عمران نذیر نے کہا کہ عوامی صحت کی سہولیات اب پنجاب کی حدود سے نکل کر دیگر علاقوں تک بھی پہنچ رہی ہیں، جس سے دور دراز علاقوں کے شہریوں کو علاج معالجے کی بہتر سہولتیں میسر آئیں گی۔
انہوں نے کہا کہ مریم نواز گلگت بلتستان، کشمیر اور پورے پاکستان کے عوام کی رہنما ہیں ۔
خواجہ عمران نذیر کے مطابق ملک بھر سے مطالبات موصول ہو رہے تھے کہ کلینک آن ویلز کی سہولت دیگر صوبوں اور علاقوں تک بھی پہنچائی جائے۔
انہوں نے کہا کہ عوامی خواہشات کا احترام کرتے ہوئے پنجاب حکومت نے صحت کی سہولیات کا دائرہ کار وسیع کرنے کا فیصلہ کیا ہے تاکہ زیادہ سے زیادہ لوگوں کو بنیادی طبی خدمات ان کی دہلیز پر فراہم کی جا سکیں۔
