پاکستان کی کھیلوں کی صنعت نے رواں مالی سال 2025-2026 کے پہلے دس ماہ کے دوران شاندار کارکردگی دکھائی ہے، جس کے تحت کھیلوں کے سامان کی مجموعی برآمدات میں 14.89 فیصد اضافہ ریکارڈ کیا گیا ہے۔
پاکستان بیورو آف شماریات کے اعداد و شمار کے مطابق جولائی تا اپریل کے دوران کھیلوں کے سامان کی برآمدات 357.911 ملین امریکی ڈالر تک پہنچ گئیں، جبکہ گزشتہ سال اسی مدت میں یہ حجم 311.514 ملین ڈالر تھا۔
اعداد و شمار کے مطابق فٹ بال کی برآمدات میں 19.92 فیصد اضافہ ہوا ہے، جو 185.202 ملین ڈالر سے بڑھ کر 221.867 ملین ڈالر تک پہنچ گئی ہیں، جو اس شعبے میں نمایاں بہتری کو ظاہر کرتا ہے۔
تاہم دستانوں کی برآمدات میں 7.60 فیصد کمی ریکارڈ کی گئی، جس کے باعث اس شعبے کا حجم 52.900 ملین ڈالر سے کم ہو کر 48.878 ملین ڈالر رہ گیا۔
اپریل 2026 کے دوران بھی مثبت رجحان دیکھا گیا، جہاں کھیلوں کے سامان کی برآمدات میں 33.38 فیصد اضافہ ہوا اور یہ 38.839 ملین ڈالر تک پہنچ گئیں، جبکہ گزشتہ سال اپریل میں یہ 29.119 ملین ڈالر تھیں۔
