وزیراعظم شہبازشریف نے کہا ہے کہ پاکستانی نوجوانوں میں آئی ٹی کی بہت صلاحیت ہے جس سے بھرپور فائدہ اٹھانا چاہئے۔ گلگت بلتستان اور آزاد کشمیر میں آسان خدمت مراکز کے قیام کا کام تیز کرنے کی ہدایت بھی کردی۔
وزارت آئی ٹی کے جائزہ اجلاس کی صدارت کرتے ہوئے وزیراعظم نے کہا آئی ٹی کا فروغ اور برآمدات میں اضافہ حکومت کی ترجیحات میں شامل ہے۔ گلگت بلتستان اور آزاد کشمیر سے متعلق ہدایات جاری کرتے ہوئے وزیراعظم نے کہا آسان خدمت سہولت شروع کرنے کیلئے صوبائی حکومتوں کے ساتھ مل کر کام کیا جائے۔
اجلاس کو بریفنگ میں بتایا گیا ملک بھر میں گھریلو انٹرنیٹ کنکشنز 2024 میں 19 لاکھ تھے جو اب 51 لاکھ ہوچکے ہیں۔ اس سال پاکستان سے ساڑھے 4 ارب سے 4 ارب 60 کروڑ امریکی ڈالر تک کی آئی ٹی برآمدات متوقع ہیں۔
اسلام آباد کے سرکاری اسکولوں اور ہیلتھ یونٹس کو فائبر کنیکٹیویٹی فراہم کر دی ہے۔ اسلام آباد کو فری انٹرنیٹ ہاٹ اسپاٹس کی فراہمی کا کام آخری مرحلے میں ہے جبکہ سید پور ماڈل ویلج اور فاطمہ جناح پارک میں ای لرننگ پاڈز نصب کئے جارہے ہیں۔
