امریکی صدر ڈونلڈ ٹرمپ نے اعلان کیا ہے کہ آبنائے ہرمز جمعے سے مکمل طور پر بحری آمدورفت کے لیے کھول دی جائے گی اور اس پر کسی قسم کا ٹول ٹیکس عائد نہیں ہوگا۔
جی سیون اجلاس کے موقع پر متحدہ عرب امارات کے صدر سے ملاقات کے بعد امریکی میڈیا سے گفتگو کرتے ہوئے صدر ٹرمپ نے کہا کہ ایران کے ساتھ طے پانے والی مفاہمتی یادداشت کا متن جلد جاری کیا جائے گا اور اس کے تحت ایران کو جوہری ہتھیار حاصل کرنے کی اجازت نہیں دی جائے گی۔
صدر ٹرمپ نے کہا کہ ایران کے ساتھ معاہدے کے دوسرے مرحلے سے متعلق پیشرفت بھی جلد متوقع ہے۔ ان کے مطابق مفاہمتی یادداشت میں واضح طور پر درج ہے کہ ایران کبھی جوہری ہتھیار حاصل نہیں کرے گا اور یہی معاہدے کی بنیادی شرط ہے۔
انہوں نے مزید بتایا کہ آبنائے ہرمز نہ صرف جمعے سے مکمل طور پر کھل جائے گی بلکہ 60 روزہ عبوری مدت کے بعد بھی بغیر کسی ٹول ٹیکس کے کھلی رہے گی۔ ٹرمپ کے مطابق معاہدے کا متن جائزے کے لیے امریکی کانگریس کو بھی بھیجا جائے گا۔
امریکی صدر کا کہنا تھا کہ ایران کے جوہری پروگرام پر مسلسل نظر رکھی جا رہی ہے اور اس کے جوہری ذخائر کی فضائی نگرانی جاری ہے۔ انہوں نے واضح کیا کہ امریکا کا مقصد ایرانی جوہری ذخائر پر قبضہ کرنا نہیں بلکہ انہیں مکمل طور پر ختم کرنا ہے تاکہ خطے اور دنیا کے لیے ممکنہ خطرات کا خاتمہ کیا جا سکے۔
ٹرمپ نے اس بات کا بھی عندیہ دیا کہ ایران کے ساتھ معاہدے کی تفصیلات پر جلد ایک خصوصی پریس کانفرنس منعقد کی جائے گی، جس میں مفاہمتی یادداشت اور آئندہ مذاکراتی عمل سے متعلق مزید معلومات فراہم کی جائیں گی۔
