وزیراعظم کی زیرصدارت قومی اقتصادی کونسل کا اجلاس کل ہوگا، وفاقی وزراء، وزراء اعلی اور وزیراعظم آزاد کشمیر شرکت کریں گے۔
اجلاس میں آئندہ مالی سال کے سالانہ ترقیاتی پروگرام سمیت میکرو اکنامک اہداف کی منظوری متوقع ہے، اگلے مالی سال کیلئے معاشی شرح نمو کا ہدف 4 فیصد رکھنے کا تخمینہ ہے، اجلاس میں اوسط مہنگائی کا تخمینہ 8.2 فیصد مقرر کرنے کی منظوری متوقع ہے۔
قومی اقتصادی کونسل قومی ترقیاتی بجٹ اور ترجیحات کا جائزہ لے گی، وفاقی وزارتوں اور صوبوں کے ترقیاتی منصوبوں پر بریفنگ دی جائے گی۔ سالانہ ترقیاتی پروگرام اور معاشی ترقی کی شرح کا ہدف بھی زیر غور آئے گا۔ قومی اقتصادی کونسل سے ترقیاتی بجٹ اور معاشی اہداف کی منظوری لی جائے گی۔
نئے مالی سال کیلئے مجوزہ ترقیاتی بجٹ کا مجموعی حجم 4 ہزار 715 ارب روپے ہے، وفاقی پی ایس ڈی پی 1126 ارب، صوبائی ترقیاتی پلان 3 ہزار 138 ارب روپے تجویز ہے۔
ریاست کے ملکیتی ادارے ترقیاتی اسکمیوں پر 451 ارب روپے الگ خرچ کریں گے، اجلاس میں 1126 ارب کے ترقیاتی بجٹ میں مزید 200 ارب شامل کرنے کی تجویز ہے۔ وزیراعظم کی منظوری سے پی ایس ڈی پی کا حجم 1326 ارب کیا جا سکتا ہے
