وفاقی وزیر بحری امور جنید انوار چودھری سے قازقستان کے ایک اعلیٰ سطح وفد نے اہم ملاقات کی، جس میں پاکستان اور قازقستان کے درمیان تجارتی و سرمایہ کاری روابط کے فروغ پر تفصیلی تبادلہ خیال کیا گیا۔
ملاقات کے دوران وفاقی وزیر نے قازق سرمایہ کاروں کو گوادر اور کراچی بندرگاہوں میں سرمایہ کاری کی دعوت دیتے ہوئے کہا کہ پاکستان کی بندرگاہیں وسطی ایشیائی ممالک کیلئے اہم تجارتی گیٹ وے بن سکتی ہیں، پاکستانی بندرگاہیں علاقائی تجارت میں کلیدی کردار ادا کر رہی ہیں اور حکومت بندرگاہی انفراسٹرکچر کو مزید مؤثر بنانے کیلئے اقدامات کر رہی ہے۔
انہوں نے قازق وفد کو ٹرانس شپمنٹ اور ملٹی پرپز ٹرمینلز میں سرمایہ کاری کی پیشکش بھی کی اور کہا کہ اس تعاون سے وسطی ایشیائی ممالک کو خلیجی اور افریقی منڈیوں تک رسائی میں نمایاں سہولت حاصل ہوگی۔
ملاقات میں قازق کمپنی فریڈم ہولڈنگ کارپوریشن کی جانب سے پاکستان میں سرمایہ کاری میں گہری دلچسپی کا اظہار کیا گیا۔
قازق وفد نے پاکستان کی معاشی اور میری ٹائم پالیسیوں پر اعتماد کا اظہار کرتے ہوئے دونوں ممالک کے درمیان تجارتی تعلقات کو مزید مستحکم بنانے کے عزم کا اعادہ کیا۔
