سندھ پنک گیمز 2026 کو شدید گرمی کے باعث اعلان کے صرف ایک روز بعد ہی ملتوی کر دیا گیا ہے۔
سندھ حکومت کی جانب سے یہ گیمز 8 سے 10 مئی تک شہید بینظیر آباد میں منعقد کرانے کا اعلان کیا گیا تھا، جبکہ تقریبِ افتتاح میں آصفہ بھٹو زرداری کی بطور مہمانِ خصوصی شرکت متوقع تھی۔
تاہم منور مہیسر نے بتایا کہ سندھ میں گرمی کی شدت میں غیرمعمولی اضافے کے باعث مختلف کھیلوں کی ایسوسی ایشنز نے ایونٹ ملتوی کرنے کی درخواست کی تھی۔
انہوں نے کہا کہ کھلاڑیوں کی صحت اور حفاظت کو مدنظر رکھتے ہوئے گیمز کو مؤخر کرنے کا فیصلہ کیا گیا ہے۔
ذرائع کے مطابق نئی تاریخوں کا اعلان مشاورت کے بعد کیا جائے گا، جبکہ منتظمین کا کہنا ہے کہ ایونٹ کو بہتر موسمی حالات میں منعقد کیا جائے گا تاکہ کھلاڑی بغیر کسی خطرے کے مقابلوں میں حصہ لے سکیں۔
یاد رہے کہ سندھ پنک گیمز کا مقصد خواتین کھلاڑیوں کو مختلف کھیلوں میں اپنی صلاحیتوں کے اظہار کے لیے پلیٹ فارم فراہم کرنا اور صوبے میں خواتین کے کھیلوں کو فروغ دینا تھا۔
