مشیر وزیراعظم راناثنااللہ کا کہنا ہے کہ پاکستان نے امریکا اور ایران کے درمیان جنگ کو رکوایا، دشمن مسلم امہ کو لڑانا چاہتا تھا لیکن پاکستان نے اسے ناکام بنایا۔
فیصل آباد میں ایک تقریب سے خطاب میں راناثنااللہ نے کہا کہ اللہ تعالیٰ نے معرکہ حق میں پاکستان کو کامیابی عطا کی، ہندوستان خود کو پاکستان سے 10گنا بڑا سمجھتا تھا، دین اور عقیدے پر یقین ہو تو اللہ تعالیٰ کامیابی دیتا ہے، معرکہ حق کی کامیابی کے بعد ہر دن پاکستان کی عزت میں اضافہ کرتا چلاگیا۔
مشیر وزیراعظم نے کہا کہ دنیا کی سپرپاور اور مسلم ملک کے درمیان جنگ دنیا میں کوئی نہ رکواسکا، جنگ رکوانے کی عزت اللہ تعالیٰ نے پاکستان کو دی، پاکستان نے امریکا اور ایران کے درمیان جنگ کو رکوایا، جنگ سے پورا خطہ متاثر ہوتا، دنیا بھی اس کے اثرات سے محفوظ نہ رہتی۔
لیگی رہنما نے کہا کہ پاکستان نے جنگ رکوا کرامن کی پاسبانی کی، پاکستان نے جنگ رکواکر پوری دنیا کو امن دیا، پاکستان نے خطے کو بھی امن دیا اور دنیا کو بھی امن دینے جارہاہے، مسلم امہ میں اتحاد کے فروغ میں پاکستان کا کلیدی کردار ہے۔
راناثنااللہ نے کہا کہ کہاجارہاتھا سعودی عرب ایران پر حملہ آور ہوجائے گا، مسلم امہ کو تباہ کرنے کیلئے یہود و نصاریٰ تیار ہیں، دین اور اسلام سے محبت کا عمل بھی پاکستان کو نصیب ہوا، دشمن مسلم امہ کو لڑانا چاہتا تھا لیکن پاکستان نے اسے ناکام بنایا، وزیراعظم،فیلڈمارشل، نائب وزیراعظم کو اللہ تعالیٰ نے عزت دی۔
