برطانیہ نے مشرقِ وسطیٰ میں تعینات اپنی افواج، شہریوں اور علاقائی اتحادیوں کے دفاع کو مضبوط بنانے کے لیے ایک نیا کم لاگت فضائی دفاعی نظام نصب کر دیا ہے جو ڈرون حملوں اور فضائی خطرات کے خلاف استعمال کیا جائے گا۔
غیر ملکی خبر رساں اداروں کے مطابق برطانوی وزارتِ دفاع نے اعلان کیا ہے کہ ایڈوانسڈ پریسیژن کل ویپن سسٹم (Advanced Precision Kill Weapon System) کو اب خطے میں آپریشنز کے لیے تعینات کر دیا گیا ہے۔ یہ نظام رائل ایئر فورس کے ٹائفون لڑاکا طیاروں پر نصب کیا گیا ہے۔
برطانوی حکام کے مطابق یہ جدید نظام پہلے استعمال ہونے والے مہنگے میزائلوں کے مقابلے میں کہیں زیادہ کم لاگت میں ڈرونز اور دیگر فضائی خطرات کو نشانہ بنانے کی صلاحیت رکھتا ہے۔
وزارتِ دفاع کے بیان میں کہا گیا ہے کہ یہ نظام مشرقِ وسطیٰ میں جاری آپریشنز کے دوران استعمال کیا جا رہا ہے جہاں آر اے ایف کے 9 اسکواڈرن کے ٹائفون طیارے برطانوی شہریوں، مفادات اور اتحادیوں کے تحفظ کے مشن پر تعینات ہیں۔
برطانوی وزیر برائے دفاعی پیداوار و صنعت لیوک پولارڈ نے کہا کہ صنعتی شراکت داروں کے ساتھ مل کر چند ماہ میں اس نظام کی تیاری اور تعیناتی ایک بڑی کامیابی ہے، جس سے فضائیہ کم لاگت میں زیادہ ڈرونز کو مار گرانے کی صلاحیت حاصل کر رہی ہے۔
انہوں نے مزید کہا کہ ٹائفون طیارے برطانیہ اور نیٹو کی فضائی دفاعی حکمت عملی کا بنیادی ستون ہیں، جو یورپ کے مشرقی محاذ اور مشرقِ وسطیٰ دونوں میں دفاعی کردار ادا کر رہے ہیں۔
