ایرانی وزارت خارجہ کے ترجمان اسماعیل بقائی نے واضح کیا ہے کہ ایران اور امریکا کے درمیان مجوزہ مفاہمتی یادداشت پر آج دستخط نہیں کیے جا رہے۔
ایک بیان میں اسماعیل بقائی نے کہا کہ امریکا اور ایران کے درمیان طے پانے والی مفاہمتی یادداشت پر اتوار کے روز دستخط نہیں ہوں گے اور فی الحال فریقین جنگ کے خاتمے اور کشیدگی میں کمی سے متعلق اقدامات پر توجہ مرکوز کیے ہوئے ہیں۔
انہوں نے کہا کہ اس مرحلے پر یہ فیصلہ کیا گیا ہے کہ جوہری پروگرام سے متعلق معاملات پر کوئی نئی بات چیت نہیں ہوگی۔ ان کے مطابق معاہدے یا مفاہمتی یادداشت پر دستخط کے لیے مناسب وقت کا انتظار کیا جا رہا ہے اور یہ عمل آج مکمل نہیں ہوگا۔
ایرانی ترجمان کا کہنا تھا کہ اگرچہ اتوار کو دستخط نہیں کیے جائیں گے، تاہم آنے والے دنوں میں مفاہمتی یادداشت پر دستخط کے امکان کو رد نہیں کیا جا سکتا۔ انہوں نے اس بات پر زور دیا کہ مذاکراتی عمل جاری ہے اور مختلف امور کا جائزہ لیا جا رہا ہے۔
اسماعیل بقائی نے مزید کہا کہ دوسرے فریق کے مؤقف میں عدم استحکام اور متضاد بیانات کے باعث اس معاملے پر کسی بھی حتمی اعلان کے بارے میں احتیاط برتنے کی ضرورت ہے۔
