نئی دہلی: بھارت کے شہری ہوابازی کے وزیر رام موہن نائیڈو نے کہا ہے کہ گزشتہ سال پیش آنے والے ایئر انڈیا کے ڈریم لائنر طیارے کے تباہ کن حادثے کی تحقیقات آخری مرحلے میں داخل ہو چکی ہیں اور اس کی حتمی رپورٹ تقریباً ایک ماہ کے اندر جاری کیے جانے کا امکان ہے۔
وزیر کے مطابق یہ حادثہ، جس میں 260 افراد جان کی بازی ہار گئے تھے، بھارتی ہوا بازی کی تاریخ کے سنگین ترین واقعات میں شمار ہوتا ہے، اور اس کی جامع تحقیقات جاری ہیں تاکہ اصل وجوہات کو حتمی طور پر سامنے لایا جا سکے۔
انہوں نے گاندھی نگر میں ایک تقریب کے دوران صحافیوں سے گفتگو کرتے ہوئے بتایا کہ تحقیقاتی عمل تقریباً مکمل ہو چکا ہے اور زیادہ تر شواہد اور تکنیکی تجزیہ حتمی شکل میں داخل ہو چکے ہیں۔
حکام کے مطابق تحقیقات میں طیارے کے تکنیکی نظام، پرواز کے دوران پیش آنے والی صورتحال، عملے کے اقدامات اور فضائی کنٹرول سے متعلق تمام پہلوؤں کا تفصیلی جائزہ لیا جا رہا ہے۔
بھارتی شہری ہوا بازی کی وزارت کا کہنا ہے کہ حتمی رپورٹ میں نہ صرف حادثے کی اصل وجہ سامنے آئے گی بلکہ مستقبل میں ایسے واقعات سے بچاؤ کے لیے سفارشات بھی شامل ہوں گی۔
یہ حادثہ گزشتہ سال اس وقت پیش آیا تھا جب ایئر انڈیا کا ڈریم لائنر طیارہ دورانِ پرواز تباہ ہو گیا تھا، جس کے بعد ملک بھر میں فضائی تحفظ سے متعلق سوالات اٹھائے گئے تھے۔
