اسلام آباد: پاکستان میں اٹلی کی سفیر مارلینا آرمیلین نے اعلان کیا ہے کہ آئندہ تین برسوں کے دوران لیبر موبیلیٹی معاہدے کے تحت 10 ہزار 500 پاکستانی شہریوں کو اٹلی میں روزگار کے مواقع فراہم کیے جائیں گے، جبکہ تعلیمی اور اقتصادی شعبوں میں دوطرفہ تعاون کو مزید وسعت دی جا رہی ہے۔
اسلام آباد میں اطالوی سفارت خانے کے زیر اہتمام اٹلی ڈے کی 80ویں سالگرہ کے موقع پر منعقدہ تقریب سے خطاب کرتے ہوئے اطالوی سفیر نے کہا کہ اٹلی اور پاکستان کے درمیان تعلقات مسلسل مضبوط ہو رہے ہیں اور دونوں ممالک مختلف شعبوں میں تعاون کو فروغ دینے کے لیے پرعزم ہیں۔
انہوں نے کہا کہ اٹلی، امریکہ اور ایران کے درمیان جاری کشیدگی کے تناظر میں پاکستان کے ثالثی اور سفارتی کردار کو سراہتا ہے اور خطے میں امن و استحکام کے لیے اسلام آباد کی کوششوں کی حمایت کرتا ہے۔ ان کا کہنا تھا کہ پاکستان ایک خوبصورت ملک ہے جو دوستی، رواداری، کشادہ دلی اور باہمی احترام جیسی اقدار کا امین ہے۔
مارلینا آرمیلین نے بتایا کہ تعلیمی شعبے میں تعاون کے تحت تعلیمی سال 2025-26 کے لیے 3 ہزار 200 پاکستانی طلبہ کو اطالوی جامعات میں داخلوں اور وظائف کے مواقع فراہم کیے گئے ہیں۔ انہوں نے کہا کہ پاکستانی نوجوانوں کی بڑی تعداد اعلیٰ تعلیم کے لیے اٹلی کا رخ کر رہی ہے، جس سے دونوں ممالک کے درمیان علمی اور ثقافتی روابط مزید مستحکم ہو رہے ہیں۔
اطالوی سفیر نے مزید کہا کہ قونصلر خدمات کو بہتر بنانے اور ویزا سمیت دیگر سفارتی سہولیات کو مزید مؤثر بنانے کے لیے بھی اقدامات جاری ہیں۔ انہوں نے اس بات پر زور دیا کہ یورپی یونین میں سب سے بڑی پاکستانی کمیونٹی اٹلی میں آباد ہے، جو دونوں ممالک کے درمیان ایک مضبوط پل کا کردار ادا کر رہی ہے۔
تقریب کے مہمانِ خصوصی علی پرویز ملک نے اپنے خطاب میں کہا کہ پاکستان اور اٹلی کے تعلقات مشترکہ مفادات، اقتصادی تعاون اور عوامی روابط پر مبنی ہیں۔ انہوں نے یاد دلایا کہ دونوں ممالک کے سفارتی تعلقات کو 78 برس مکمل ہو چکے ہیں اور یہ تعلقات وقت کے ساتھ مزید مضبوط ہوئے ہیں۔
انہوں نے امید ظاہر کی کہ پاک۔یورپی تزویراتی مذاکرات کے بعد اطالوی کمپنیاں پاکستان میں سرمایہ کاری، تجارت اور صنعتی تعاون میں مزید دلچسپی لیں گی، جس سے دونوں ممالک کے اقتصادی تعلقات کو نئی جہت ملے گی۔
