اومان کے ساحل کے قریب تجارتی بحری جہازوں پر ہونے والے حملوں کے خلاف بھارت نے ایک بار پھر سخت ردعمل کا اظہار کرتے ہوئے دہلی میں تعینات امریکی ڈپٹی چیف آف مشن جیسن میکس کو طلب کر لیا ہے۔
بین الاقوامی خبر رساں ادارے رائٹرز کے مطابق بھارتی حکام نے تین روز کے دوران دوسری مرتبہ امریکی سفارت کار کو دفتر خارجہ طلب کرکے اپنے تحفظات اور احتجاج سے آگاہ کیا۔ ذرائع کے مطابق نئی دہلی نے اومان کے ساحل پر تجارتی جہازوں کو نشانہ بنائے جانے کے واقعات پر شدید تشویش کا اظہار کیا ہے۔
رپورٹ کے مطابق بدھ کے روز بھی امریکی سفارت کار کو طلب کیا گیا تھا، جب ایک پالاؤ کے پرچم بردار آئل ٹینکر پر حملے میں تین بھارتی ملاح ہلاک ہو گئے تھے۔ بھارتی حکومت نے اس واقعے پر واشنگٹن کے سامنے سخت احتجاج ریکارڈ کرایا تھا۔
بھارتی ذرائع کے مطابق جمعرات کو ایک اور تجارتی جہاز، جس پر 20 بھارتی عملہ سوار تھا، حملے کی زد میں آیا۔ تاہم اس واقعے میں کسی جانی نقصان یا زخمی ہونے کی اطلاع موصول نہیں ہوئی۔
ذرائع کا کہنا ہے کہ بھارتی وزارت خارجہ نے امریکی سفارت کار سے ملاقات کے دوران واضح کیا کہ تجارتی جہازوں اور ان پر سوار شہری عملے کی سلامتی کو یقینی بنایا جانا چاہیے اور ایسے واقعات خطے میں کشیدگی کو مزید بڑھا سکتے ہیں۔
دوسری جانب نئی دہلی میں امریکی سفارت خانے نے فوری طور پر اس معاملے پر کوئی باضابطہ ردعمل نہیں دیا۔
