امریکی صدر Donald Trump کی تصویر ممکنہ طور پر جلد 250 ڈالر کے امریکی کرنسی نوٹ پر نظر آسکتی ہے، جس کے لیے امریکی محکمہ خزانہ میں ابتدائی سطح پر تیاریوں کی اطلاعات سامنے آئی ہیں۔
غیر ملکی میڈیا رپورٹس کے مطابق امریکی اخبار The Washington Post نے دعویٰ کیا ہے کہ 250 ڈالر کے مجوزہ نوٹ پر ڈونلڈ ٹرمپ کی تصویر شامل کرنے کی تجویز زیر غور ہے۔ اگر یہ منصوبہ عملی شکل اختیار کرتا ہے تو تقریباً ڈیڑھ صدی بعد پہلی مرتبہ کسی زندہ شخصیت یا موجودہ امریکی صدر کی تصویر کرنسی نوٹ پر شائع ہوگی۔
رپورٹ کے مطابق یہ مجوزہ نوٹ امریکا کی آزادی کے 250 سال مکمل ہونے کی مناسبت سے تیار کیا جا رہا ہے۔ بتایا گیا ہے کہ گزشتہ برس امریکی محکمہ خزانہ میں تعینات ٹرمپ کے دو قریبی عہدیداروں نے بیورو آف اینگریونگ اینڈ پرنٹنگ کے عملے کو ابتدائی ڈیزائن اور نمونے تیار کرنے کی ہدایت بھی دی تھی۔
رپورٹ میں مزید کہا گیا کہ بعض حکام نے اس تجویز پر قانونی اعتراضات اٹھائے کیونکہ امریکی قانون کے تحت کسی زندہ شخصیت یا موجودہ صدر کی تصویر کرنسی پر شائع نہیں کی جا سکتی۔ بیورو آف اینگریونگ اینڈ پرنٹنگ کی سابق ڈائریکٹر پیٹریشیا سولیمین نے بھی قانونی اور انتظامی رکاوٹوں کی نشاندہی کی تھی، تاہم بعد ازاں انہیں عہدے سے ہٹا دیا گیا۔
دوسری جانب ناقدین نے اس منصوبے کو شدید تنقید کا نشانہ بنایا ہے۔ ان کا کہنا ہے کہ ٹرمپ انتظامیہ قومی اداروں اور علامتی ریاستی شناخت پر ذاتی اثر و رسوخ قائم کرنے کی کوشش کر رہی ہے۔ امریکی سینیٹر Mark Warner نے اس منصوبے کو “صدر ٹرمپ کی انا کو بڑھانے کی کوشش” قرار دیا۔
