امریکی صدر ڈونلڈ ٹرمپ نے دعویٰ کیا ہے کہ امریکا کے تین جنگی بحری جہاز کامیابی سے آبنائے ہرمزعبور کر چکے ہیں اور انہیں کسی قسم کا نقصان نہیں پہنچا۔
سوشل میڈیا پر جاری بیان میں انہوں نے کہا کہ ان بحری جہازوں پر حملے کی کوشش کی گئی تاہم تمام حملے ناکام بنا دیے گئے۔ ان کے مطابق حملہ آور ایرانی کشتیوں کو شدید نقصان پہنچا اور انہیں تباہ کر دیا گیا۔
ٹرمپ نے کہا کہ ایرانی چھوٹی کشتیوں کو سمندر میں ڈبو دیا گیا جبکہ ان کی جانب سے داغے گئے میزائلوں کو امریکی دفاعی نظام نے آسانی سے ناکارہ بنا دیا۔ انہوں نے مزید کہا کہ ڈرون حملوں کو بھی فضا ہی میں تباہ کر دیا گیا۔
اپنے بیان میں امریکی صدر نے ایران کی قیادت پر تنقید کرتے ہوئے کہا کہ اگر یہ صورتحال کسی معمول کے ملک کے ساتھ ہوتی تو وہ امریکی جنگی جہازوں کو گزرنے دیتا، لیکن ایران کا طرزِ عمل مختلف ہے۔
انہوں نے الزام لگایا کہ ایران کی قیادت شدت پسند عناصر کے زیر اثر ہے اور اگر اسے جوہری ہتھیار حاصل کرنے کا موقع ملا تو وہ اسے استعمال کر سکتی ہے، اسی لیے امریکا اسے روکنے کے لیے پرعزم ہے۔
ٹرمپ نے یہ بھی کہا کہ اگر ایران نے امریکا کے ساتھ کسی معاہدے پر دستخط نہ کیے تو آئندہ مزید سخت اقدامات کیے جائیں گے۔ ان کے مطابق امریکی بحری جہاز خطے میں اپنی موجودگی برقرار رکھیں گے اور کسی بھی صورتحال سے نمٹنے کے لیے تیار ہیں۔
یہ بیان ایسے وقت میں سامنے آیا ہے جب ایران اور امریکا کے درمیان کشیدگی انتہائی بڑھ چکی ہے اور دونوں ممالک ایک دوسرے پر حملوں اور خلاف ورزیوں کے الزامات عائد کر رہے ہیں۔
