یروشلم میں تعینات امریکی سفیر مائیک ہکابی نے انکشاف کیا ہے کہ اسرائیل نے اپنے جدید آئرن ڈوم ایئر ڈیفنس سسٹم کی بیٹریاں اور متعلقہ اہلکار متحدہ عرب امارات (یو اے ای) کو فراہم کر دیے ہیں، تاکہ خطے میں بڑھتے ہوئے فضائی خطرات کے مقابلے میں دفاعی صلاحیت کو مضبوط بنایا جا سکے۔
رائٹرز کے مطابق یہ دفاعی نظام ایران سے منسوب حملوں کے خدشات کے پیش نظر یو اے ای کو منتقل کیا گیا ہے۔ ایک ذریعے نے بتایا کہ ان بیٹریوں میں ریڈار سسٹمز اور میزائل لانچر شامل ہیں جو فضائی خطرات کو روکنے کی صلاحیت رکھتے ہیں۔ رپورٹ کے مطابق ایران نے حالیہ کشیدگی کے دوران متعدد بار متحدہ عرب امارات کو نشانہ بنایا ہے، جس کے بعد خطے میں سکیورٹی تعاون مزید بڑھ گیا ہے۔
امریکی سفیر مائیک ہکابی نے تل ابیب میں ایک تقریب کے دوران کہا کہ یہ تعاون اسرائیل اور یو اے ای کے درمیان ابراہام معاہدے کے تحت قائم ہونے والے تعلقات کا نتیجہ ہے، جنہوں نے دفاعی اور سکیورٹی شعبوں میں غیر معمولی تعاون کو فروغ دیا ہے۔
انہوں نے کہا کہ اسرائیل ماضی میں بھی متحدہ عرب امارات کو فضائی دفاعی نظام فراہم کر چکا ہے اور موجودہ اقدام اسی تسلسل کا حصہ ہے جس کا مقصد خطے میں مشترکہ دفاعی حکمت عملی کو مضبوط بنانا ہے۔
رپورٹ کے مطابق یو اے ای کے سینئر مشیر انور گرقاش نے پہلے بھی کہا تھا کہ خطے میں ایرانی حملوں کے خطرات نے عرب ریاستوں اور اسرائیل کے درمیان سکیورٹی تعاون کو مزید قریب کر دیا ہے۔
