اجلاس میں ملک میں پٹرولیم مصنوعات کے ذخائر کی صورتحال کا تفصیلی جائزہ لیا گیا، اجلاس میں پاکستان میں پٹرول اور ڈیزل کا سٹاک تسلی بخش قرار دیا گیا۔
وزارت پٹرولیم کے مطابق مئی 2026 کے تیسرے ہفتے تک پٹرولیم مصنوعات کی بلا تعطل فراہمی یقینی ہے، سپلائی چین کی مانیٹرنگ کے لیے نیشنل کوآرڈینیشن کمیٹی فعال کر دی گئی۔
اجلاس کو بتایا گیا کہ این سی ایم سی روزانہ کی بنیاد پر پٹرولیم سپلائی کی نگرانی کر رہی ہے۔
نائب وزیراعظم نے ایندھن کی دستیابی یقینی بنانے پر متعلقہ اداروں کی کارکردگی کی تعریف کی، اجلاس میں وفاقی وزراء، طارق باجوہ، سیکرٹری داخلہ اور چیئرمین اوگرا نے شرکت کی۔
دریں اثنا نائب وزیراعظم اسحاق ڈار کے زیر صدارت ریفائنریز اور آئل سٹوریج فیسیلٹیز کی سکیورٹی سے متعلق جائزہ اجلاس ہوا، شرکا کو بریفنگ دی گئی کہ سٹریٹجک تنصیبات کی سکیورٹی یقینی بنانے کے لیے ضروری اقدامات کیے جا رہے ہیں۔
اجلاس کو بریفنگ دی گئی کہ ریفائنریز اور آئل مارکیٹنگ کمپنیوں سمیت تمام سٹیک ہولڈرز کی مشاورت سے ضروری اقدامات کئے جا رہے ہیں، اضافی سکیورٹی اقدامات کے اخراجات آئل مارکیٹنگ کمپنیاں برداشت کریں گی۔
نائب وزیراعظم اسحاق ڈار نے موجودہ سکیورٹی انتظامات پر اطمینان کا اظہار کیا، اسحاق ڈار نے ملک بھر میں ایندھن کی بلا تعطل فراہمی کو یقینی بنانے کے لیے توانائی کے بنیادی ڈھانچے کے تحفظ کے حکومت کے عزم کا اعادہ کیا۔
