وزیراعظم شہبازشریف کا کہنا ہے کہ آبی ذخائر اور پن بجلی منصوبے ترقیاتی بجٹ کی اولین ترجیحات میں شامل ہیں، ترقیاتی منصوبوں میں پبلک پرائیویٹ پارٹنرشپ کی حوصلہ افزائی کی جائے۔
وزیراعظم کی زیرصدارت موجودہ اور آئندہ مالی سال کے وفاقی ترقیاتی پروگرام کا جائزہ اجلاس ہوا۔ وزیراعظم نے واضح کیا کہ بہتر کارکردگی والی وزارتوں کے ترقیاتی منصوبوں کو ترجیحی بنیادوں پر فنڈز دیئے جائیں گے۔
شہبازشریف نے کہا کہ ایسے منصوبوں میں عوامی پیسہ لگائیں گے جن کے نتائج یقینی ہوں، آبی ذخائراورپن بجلی منصوبے ترقیاتی بجٹ کی اولین ترجیحات میں شامل ہیں، پانی کے ذخائر کو بڑھانے کے منصوبوں کو ترجیح دی جائے گی۔
اجلاس میں وزیراعظم نے پانڈا بانڈز کےکامیاب اجراء اورمارکیٹ پذیرائی کو سراہا، وزیراعظم نے ریلوے، آئی ٹی اور وزارت توانائی کی کارکردگی کی تعریف کی۔
اجلاس کو رواں برس کے پی ایس ڈی پی،مجوزہ ترقیاتی منصوبوں اور درکار فنڈز پر بریفنگ دی گئی، شرکاء کو داسو، دیامر بھاشا اور مہمند ڈیمز سمیت آبی ذخائر اور پن بجلی منصوبوں کی پیش رفت سے آگاہ کیا۔
اجلاس میں نائب وزیراعظم و وزیرِ خارجہ اسحاق ڈار، وفاقی وزراء عبدالعلیم خان، رانا تنویر، شزا فاطمہ، حنیف عباسی، اویس لغاری، معین وٹو شریک تھے۔ خالد مقبول صدیقی، وزیرمملکت بلال اظہر کیانی، ہارون اختر اور متعلقہ اعلی حکام بھی شریک ہوئے۔
