تہران: ایرانی فوج نے تجارتی بحری جہازوں اور تیل بردار ٹینکروں کو خبردار کیا ہے کہ آبنائے ہرمز سے گزرنے کے لیے ایرانی ہدایات اور مقررہ بحری راستوں کی پابندی ضروری ہے، بصورت دیگر سنگین نتائج سامنے آ سکتے ہیں۔
ایرانی فوج کے جاری کردہ بیان میں کہا گیا ہے کہ آبنائے ہرمز پر ایران کا کنٹرول مستحکم اور مؤثر ہے، اس لیے تمام تجارتی جہازوں اور آئل ٹینکروں کو ایرانی حکام سے اجازت حاصل کرنے کے بعد طے شدہ روٹس کے مطابق سفر کرنا ہوگا۔
بیان کے مطابق جو جہاز مقررہ راستوں سے ہٹ کر یا ضروری اجازت کے بغیر گزرنے کی کوشش کریں گے، وہ نہ صرف اپنی بلکہ دیگر بحری جہازوں کی سلامتی اور ٹریفک کے لیے بھی خطرہ بن سکتے ہیں۔
یہ بیان ایسے وقت میں سامنے آیا ہے جب خطے میں بحری آمد و رفت کے حوالے سے سرگرمیاں تیز ہو رہی ہیں۔ امریکی صدر Donald Trump کی جانب سے آبنائے ہرمز میں بحری ناکہ بندی کے خاتمے کے اعلان کے بعد گزشتہ 24 گھنٹوں کے دوران 24 بحری جہاز اس اہم آبی گزرگاہ سے گزر چکے ہیں۔
ایرانی پاسدارانِ انقلاب کے مطابق ان جہازوں میں تیل بردار ٹینکرز اور کنٹینر بردار بحری جہاز شامل تھے، جبکہ ان کی محفوظ نقل و حرکت ایرانی بحریہ کے تعاون سے ممکن بنائی گئی۔
