آئی سی سی کے قوانین میں بڑی تبدیلیوں پر غور، ایک ہی ٹیسٹ میں ریڈ اور پنک بال کے استعمال کی تجویز
انٹرنیشنل کرکٹ کونسل کے آئندہ اجلاس میں کرکٹ قوانین میں کئی اہم تبدیلیوں پر غور کیا جائے گا، جن میں ایک ہی ٹیسٹ میچ کے دوران ریڈ اور پنک بال کے استعمال کی منفرد تجویز بھی شامل ہے۔
میڈیا رپورٹس کے مطابق چیف ایگزیکٹیوز کمیٹی کے 21 مئی کو ہونے والے ورچوئل اجلاس میں ایک ورکنگ گروپ نے سفارش پیش کی کہ اگر ٹیسٹ میچ کے دوران خراب موسم یا روشنی کی کمی کے باعث کھیل متاثر ہو اور مقابلہ فلڈ لائٹس میں جاری رکھنا پڑے تو ریڈ بال کی جگہ پنک بال استعمال کی جا سکے۔
تجویز کے مطابق یہ تبدیلی صرف اسی صورت میں ممکن ہوگی جب دونوں ٹیمیں اس پر متفق ہوں اور امپائرز اجازت دیں۔ اس اصول کو ڈی آر ایس نظام کی طرز پر رکھا جائے گا، جہاں دونوں ٹیموں کی رضامندی ضروری ہوتی ہے۔
آئی سی سی غیر قانونی بولنگ ایکشن کی جانچ کے لیے جدید ٹیکنالوجی کے استعمال پر بھی غور کر رہا ہے۔ نئی تجویز کے تحت امپائرز کو ہاک آئی ڈیٹا تک رسائی دی جا سکتی ہے تاکہ میچ کے دوران ہی ایسے بولرز کے ایکشن کی نگرانی کی جا سکے جن کے بازو کے خم کی حد 15 ڈگری سے تجاوز کرے۔
اس کے علاوہ ٹی ٹوئنٹی انٹرنیشنل میچز میں اننگز کے درمیان وقفہ 20 منٹ سے کم کرکے 15 منٹ کرنے کی تجویز بھی زیر غور ہے تاکہ کھیل کو مزید تیز اور ناظرین کے لیے دلچسپ بنایا جا سکے۔
ون ڈے کرکٹ میں ہیڈ کوچز کو ڈرنکس بریک کے دوران میدان میں جا کر کھلاڑیوں سے براہ راست گفتگو کی اجازت دینے کی تجویز بھی پیش کی گئی ہے۔ ٹی ٹوئنٹی کرکٹ میں یہ سہولت پہلے ہی موجود ہے۔
